Drosophila suzukii

Monitering en identifikasie

Drosophila suzukii-volwassenes kan met behulp van geel McPhail- of tuisgemaakte lokvalle gevang word.

Tuisgemaakte lokvalle is basies plastiekheuningpotte met gaatjies om die rand en appelasyn binne-in. Appelasyn of kommersiële lokmiddels kan in McPhail-lokvalle gebruik word. Volwasse Drosophila suzukii is 2–3 mm lank, dus kleiner as volwasse Mediterreense vrugtevlieë, wat 3.5–5 mm lank is. Manlike suzuki-asynvlieë ontwikkel kenmerkende swart kolle op hulle vlerke binne ’n paar ure nadat hulle uit hul papies verskyn.

Wyfies het nie die kolle nie. Manlike suzuki-asynvlieë het ook twee rye swart haartjies op hulle voorbene. Wyfies, daarenteen, het ’n saagvormige eierboor wat hulle in staat stel om ’n snit in ’n onbeskadigde vrug te maak en hulle eiers daarin te lê (Figuur 1). Suzuki-asynvlieg se vinnige voortplanting by relatiewe lae temperature verhoog die waarskynlikheid van bevolkingsontploffings.

Entomoloog dr. Gulu Bekker het vrugte met eiers geïnfesteer en by 20–22 °C gehou. Volwasse vlieë het binne 16 dae verskyn. “Teen die tyd wat jy ’n vlieg in ’n lokval vang, gaan jy waarskynlik reeds baie vrugskade hê,” het Karsten gewaarsku. “Vrugskadebepalings gaan dus kritiek wees, omdat die vlieë so vinnig voortplant.” Vrugskadebepalings word met die flotasiemetode gedoen.

Rypwordende vrugte word vanaf bome in die boord versamel – nie van die grond af nie – en platgedruk of opgesny. Die stukkies word in ’n 18% suikeroplossing of ’n 8% soutoplossing geplaas. Na ongeveer ’n uur word die oplossing deur ’n sif gegooi om die larwes te versamel.

Dit is onmoontlik om die onvolwasse stadiums van verskillende asynvlieë uitmekaar te ken, maar onvolwasse stadiums in andersins onbeskadigde vrugte is waarskynlik Drosophila suzukii, omdat ander asynvlieë nie hulle eiers in onbeskadigde vrugte kan lê nie. Die verskillende asynvlieglewenstadiums word met dié van Mediterreense vrugtevlieg in Figuur 2 vergelyk.

Beheermaatreëls

“Daar is ’n paar bestuurstrategieë wat ons weet in ander wêrelddele werk,” het Karsten gesê. “Die eerstes, wat geld vir alle vrugtevlieë, is monitering, boordsanitasie en bestuur van alternatiewe gashere.

” Vrugtevlieë en asynvlieë sal aanhou ontwikkel in vrugte wat sleg word of afval. Sulke vrugte dien as ’n bron van volwasse vrugte- en asynvlieë. Vrugte op plante buite boorde kan ook ’n teelaarde vir vrugtevlieë wees. Karsten is veral besorg oor braambosse as moontlike alternatiewe gashere. Wat chemiese beheer betref, is daar reeds ’n klompie noodregistrasies vir produkte teen suzuki-asynvlieg in SA.

“Ons sien wel baie lang onthoudingstydperke vir alles wat reeds noodregistrasies ontvang het,” het Karsten gesê. “Ons gaan waarskynlik groot uitdagings hê ten opsigte van onthoudingstydperke vir baie van die produkte gegewe die vinnige lewensiklus van die vlieg.” Karsten het ook die risiko van weerstand uitgelig.

Daar is reeds wetenskaplike publikasies oor die ontwikkeling van weerstand teen middels wat in ander wêrelddele gespuit word. “Ons moet in gedagte hou dat ons verantwoordelik met chemie moet werk,” het Karsten gesê, “want daar is op hierdie stadium slegs ’n paar produkte wat registrasies het.”

Sy het beklemtoon dat monitering voor toediening van chemie noodsaaklik is, en dat produsente onthoudingstydperke as deel van ’n geïntegreerde plaagbestuurstrategie in gedagte moet hou. Lok-en-dood kan ook effektief wees, maar lokmiddels vir Mediterreense vrugtevlieg is nie vir Drosophila suzukii aantreklik nie.

’n Geregistreerde lok-en-dood produk vir suzuki-asynvlieg is wel onlangs geregistreer vir kommersiële gebruik. Appelasyn werk ook as ’n lokmiddel vir grootskaalse vangste.

Navorsingsprojekte

Suzuki-asynvlieg mag moontlik nie marktoegangimplikasies hê nie, aangesien dié indringer reeds in meeste van ons uitvoermarkte voorkom.

“Die verspreiding in baie van daardie lande is egter beperk,” sê Karsten, “so markte kan nog steeds vir voor- en naoesmitigasie vra.”

Gelukkig is onvolwasse Drosophila suzukii baie koue-sensitief en behoort nie die hui- dige koue-sterilisasie protokolle en standaard verskepingstemperature en -tye te oorleef nie. Die ontwikkeling van naoesbehandelings van steenvrugte en kersies, insluitende vir lugvrag, word wel in ’n nuwe Hortgro- befondsde projek ondersoek. Twee ander projekte wat vir 2024/5 goedgekeur is, fokus op voor-oes-aspekte.

Die werk word gesamentlik deur Hortgro, South Africa Wine, BerriesZA en SATI befonds. Die eerste projek gaan oor risikobestuur en mik om die effek van temperatuur, seisoen, produksie-area, en alternatiewe gashere op vliegbevolkings te verstaan. Kultivarverskille in vatbaarheid sal ook ondersoek word.

Die tweede projek handel oor die ontwikkeling van geïntegreerde plaagbestuurmaatreëls, insluitende grootskaalse vangste, spat en biologiese beheer. Vir diegene wat meer inligting soek, raadpleeg die Maart 2025 uitgawe van Fresh Quarterly, Hortgro Science se teg-niese tydskrif, wat gratis vanaf 1 Maart 2025 by www.freshquarterly.co.za beskikbaar sal wees.