Dekgewasse in boorde

Dekgewasprestasie in boorde

Die dekgewasproewe is vir die eerste keer op die Warm Bokkeveld-perseel gesaai in 2017, en op die Koue Bokkeveld-perseel in 2018. Die plante is weer gesaai in 2020 met behulp van ‘n saaimasjien. Vier behandelings – sien Tabel 1 – is op elke perseel gevestig. Die kontrole het geen dekgewasse in die werksry gehad nie.

“Ons gaan van eenvoudig na kompleks in vier stappe in die werksry,” verduidelik Addison. “In die boomry het ons vir alle praktiese doeleindes dekgewasse onder die bome geplant in twee van die behandelings.” Elke behandeling beslaan vier boordrye van 120 meter.
Tot dusver is die prestasie van al die behandelings bevredigend, alhoewel almal kompetisie van onkruide ervaar.

Ekosisteme in organiese boorde beduidend verskil van ekosisteme in konvensionele boorde.

Onkruidonderdrukking is ‘n potensiële voordeel van dekgewasse, maar dit realiseer slegs indien die dekgewasse sterker groei as die onkruide.

Droëmassaproduksie van die verskillende groepe dekgewasplante is aan die einde van 2018 gemeet. Die Koue Bokkeveld-perseel het aansienlik meer droë materiaal gelewer as die Warm Bokkeveld-perseel. Oor die algemeen, hoe meer divers die dekgewas, hoe meer droë materiaal het dit produseer. Sedert 2018 is die dekgewasse jaarliks platgerol in beide die werksrye en die boomrye, sodat die biomassa in die grond opgeneem kan word.

Een mikpunt van die proewe is om ‘n manier te vind om die groei en produksie van dekgewasse te meet sonder om hulle te vernietig. Addison en Ansuli Theron, die meesterstudent op die projek, het elke maand digitale foto’s geneem en geëvalueer om die hoogte en volume van die plante te bepaal.

Daarby het hulle grondmonsters versamel vir fisiese, chemiese en biologiese ontledings; nematode-analises, insluitende ‘n diversiteitsindeks; swamdiversiteitsindekse; en bepalings van grondfauna en plantreste-afbraak. Voorlopige resultate wys ‘n neiging na verhoogde grondkoolstofvlakke en aggregaatstabiliteit vanaf 2018 tot 2019 in die dekgewasbehandelings. Mikrobiese aktiwiteit, gemeet as grondrespirasie-tempo, het ook vermeerder.

Die status van die verskillende dekgewasspesies as gashere vir plantvretende nematodes is deur Dr Rinus Knoetze van die Nematologie Laboratorium by die LNR ondersoek. Hy het gevind dat meeste van die dekgewasse swak gashere is, behalwe vir bokwiet, wat ‘n baie goeie gasheer is.

Vergelykings tussen die voedselkettings in die grond by die Koue Bokkeveld-perseel het gewys dat hulle meer kompleks geraak het, met meer spesies en interaksies, vanaf 2018 tot 2019. Dit het gegeld vir die behandelings en die kontrole, en weerspieël die herstel van die stelsel sedert die grond bewerk is voordat bome in 2017 geplant is.

Oor die algemeen blyk die voedselkettings in die dekgewasbehandelings meer stabiel en kompleks te wees as dié in die kontroles.

Daarby was bakteriese en swamdiversiteit hoër, en die collembola meer, in behandelings met ‘n groter diversiteit as in behandelings met ‘n kleiner diversiteit van plante.

“Dit neem tyd vir die stelsel om te stabiliseer en divers te raak, en daar is sterk skakels tussen dit wat onder die boom gebeur, en dit wat in die werksry gebeur,” sê Addison.

Vir meer oor hierdie dekgewasproewe, besoek die Hortgro YouTube-kanaal en soek vir die Cover-crop Trials-speellys, of maak gebruik van die QR-kode.

Kleinskaalse dekgewasproewe

Addison en Theron het verskeie addisionele dekgewaskandidate in kleinskaalse proewe in boorde in die Warm en Koue Bokkeveld uitprobeer. Tef, witmosterd, ertjies, lusern, aarbeiklawer, karmosynklawer, en serradella is getoets. Elkeen is in drie vakkies van 3 x 2 meter in die werksry gesaai.

Die dekgewasse is in Mei 2018 vir die eerste maal gesaai. Tef en serradella het nie ontkiem nie. Lusern, aarbeiklawer en karmosynklawer het gevestig en relatief goed gegroei op die Koue Bokkeveld-perseel. Witmosterd en ertjies het die winter oorleef op die Warm Bokkeveld-perseel. Oor die algemeen was ontkieming en saailinggroei teleurstellend op die Warm Bokkeveld-perseel, waarskynlik as gevolg van swak dreinering op swaar kleigronde.

“Diverse gronde meer volhoubaar en produktief as gronde met lae diversiteit.”

‘n Soortgelyke eksperimentele ontwerp is gebruik om verskeie plante wat as blomdekgewasse kan dien te toets. Blomdekgewasse is voordelig omdat hulle bestuiwers en roofdiertjies lok. Bloublommetjies, vygies, kamille, koljander, dille, tiemie, oreganum en heuningblom is in Mei 2018 gesaai. Tiemie en oreganum het nie ontkiem nie en al die plante het swak gevaar op die Warm Bokkeveld-perseel.

Die blomdekgewasse het beter geaard op die Koue Bokkeveld-perseel. Kamille en heuningblom het sterk geblom, en toe die vakkies weer in 2019 nagegaan is, was heuningblom steeds teenwoordig. Beide kamille en heuningblom groei laag, en is dus geskik om onder bome te plant.

Oor die algemeen was die vestiging van dekgewasse op die Warm Bokkeveld-perseel ‘n uitdaging as gevolg van swaar kleigronde en strawwe onkruidkompetisie. Dit beklemtoon net weer die reuse uitwerking van verskillende omgewingstoestande op dekgewasse, en hoe belangrik dit is dat produsente self eksperimenteer om die beste oplossings vir hulle eie boorde te vind.

Addison glo dat die aanvraag na meer volhoubare en volhardende voedselproduksie sal aanhou toeneem, en dat dekgewasse sentraal sal wees tot Suid-Afrikaanse produsente se pogings om hieraan te voldoen.

“Ek is oortuig dat ons markte gaan begin onderskeid tref op grond van hoe ons voedsel produseer,” sê Addison. “En as jy kyk na die basiese ekologiese navorsing, dan is diverse gronde meer volhoubaar en produktief as gronde met lae diversiteit.”