Bestuur van appelherplantsiekte

'n Veelkoppige monster

Appelherplantsiekte word deur 'n kompleks van nematodes, swamme, en oomisiete veroorsaak. Oomisiete is mikroörganismes wat lyk soos swamme maar nader verwant is aan alge soos kelp. Die mikrobiese bevolking in elke herplantsiektegrond is uniek en daarom werk breëspektrum-ingrepe gewoonlik beter as nouspektrumbehandelings.

"Grondberoking is breëspektrum – dit dood of onderdruk alles in die grond – terwyl semiselektiewe middels op spesifieke patogene gemik is," verduidelik McLeod.

Sy het verskillende kombinasies van grondberoking en semiselektiewe middels met 'n onbehandelde kontrole vergelyk. Die proefboorde is in 2013 en 2014 in Grabouw en die Koue Bokkeveld geplant. Die semiselektiewe middels het fenamifos, imidaklopried, metalaksil, en kaliumfosfonaat ingesluit. Grondberokingsmiddels het chloorpikrien en 1,3-dichloropropeen-
kombinasies en metielbromied ingesluit.

Fenamifos dood aalwurms en metalaksil en kaliumfosfonaat dood oomisiete. Imidaklopried is gebruik om bloedluis te beheer. "Bloedluis kan jou proewe regtig deurmekaar gooi," sê McLeod, "so ons sluit imidaklopried by al ons behandelings in."

Die resultate het betekenisvolle verbeterings in boomgroei getoon drie tot vier
jaar na vestiging in die behandelings met semiselektiewe middels – met of sonder bero-
king – teenoor die onbehandelde kontrole. Verbeterings in opbrengste in vergelyking met die kontrole was egter meer met bero-king as met die semiselektiewe middels.

McLeod wys daarop dat die gebrek aan 'n swamdoder dalk tot die wisselvallige uitwerking van die semiselektiewe middels kon bygedra het. "Ons weet dat sekere swamme 'n rol in herplantsiekte speel, maar meeste swamdoders beweeg nie goed deur die grond nie, en daar is nie 'n swamdoder wat ons dink sal as 'n grondtoediening werk nie."

Help organiese materiaal?

Vier nuwe boordproewe is in 2017 en 2018 in Grabouw en die Koue Bokkeveld gevestig. Verskillende kombinasies van grondberoking en semiselektiewe middels is weer met 'n onbehandelde kontrole vergelyk. Die semiselektiewe middels het fluopyram, imidaklopried, mefenoksam, en kaliumfosfonaat ingesluit.

Grondberokingsmiddels het chloorpikrien en 1,3-dichloropropeen-kombinasies en metamnatrium ingesluit.

Mefenoksam het metalaksil as een van die oomisietdoders in die nuwe proewe vervang. Fluopyram het fenamifos as die aalwurmdoder vervang.

"Fluopyram is 'n interessante produk omdat dit 'n nematosied met aktiwiteit teen swamme is, alhoewel dit nie breëspektrum is nie," sê McLeod. "Ons het gesien dat dit teen hoë dosisse sekere herplantswamme op sekere persele onderdruk."

Benewens die verskillende chemiese behandelings het die proewe ook kombinasies van kompos, deklae, en oomisietdoders ingesluit. "Die literatuur vertel vir jou dat kompos en deklae alleen nie betroubare beheer verskaf nie," sê McLeod. "Dit is hoekom ons dit nie as alleenstaande behandelings getoets het nie."

Die nuwe proewe het gemengde resultate opgelewer. Twee uit die vier boorde het geblyk nie 'n herplantsiekteprobleem te hê nie, aangesien daar geen verskil tussen die prestasie van bome op berookte en onberookte grond was nie.

Die derde boord het wisselvallig op behandeling gereageer. "Ek vermoed daar was iets in daardie boord wat nie deur ons semiselektiewe mengsel onderdruk kon word nie," spekuleer McLeod.

"Moontlik nematodes, omdat ons fluopyram in stede van fenamifos in hierdie proewe gebruik het."

In die vierde boord was die kombinasie van semiselektiewe middels, kompos, en 'n deklaag net so effektief as beroking. McLeod beplan verdere proewe om hierdie resultate te bevestig en te verfyn. "Ons gaan 'n semiselek-tiewe mengsel met fenamifos insluit, en dit kombineer met kompos en 'n deklaag. En ons gaan die fluopyram meer as een keer aanwend om te sien of ons beter resultate kry."

Beste praktyke vir herplantsiekte

McLeod is bekommerd dat produsente oorhaastige gevolgtrekkings sal maak op gronde van hoe goed die vierde boord na die aanwending van semiselektiewe middels, kompos, en 'n deklaag presteer het. "Herplantsiekte verskil tussen persele – jy kan nie aanbevelings baseer op data van slegs een boord nie," waarsku sy, veral aangesien die behandelings oneffektief in een van die ander boorde was.

Vir eers is beroking met chloorpikrien en 1,3-dichloropropeen-kombinasies die veiligste opsie. Alhoewel baie produsente steeds verlang na metielbromied het McLeod bewys dat chloorpikrien en 1,3-dichloropropeen net so goed werk, solank produsente die beste praktyke vir die bestuur van herplantsiekte volg.

"Die aanbeveling is dat jy nie 'n boord moet uittrek en hervestig in dieselfde jaar nie, want dit is nie moontlik om al die wortels te verwyder nie en dié wat agterbly het nie 'n kans om te ontbind nie," sê sy. "Met metielbromied kon jy wegkom met vroeër plant omdat dit die wortels beter penetreer het, maar die nuwe produkte beweeg nie so goed in die grond nie."

McLeod sien semiselektiewe middels as aanvullend tot beroking, veral wanneer kwekerybome dalk besmet kan wees. Opnames het die voorkoms van herplantpatogene in kwekerybome bevestig en besmette kwekerybome is onafwendbaar, solank as wat bome van aflêers en in oop grond op persele waar vrugte reeds voorheen verbou is, in stede van weefselkultuur en in steriele medium in potte gemaak word.

In die toekoms gaan McLeod anaërobiese gronddisinfestasie toets. Dit behels die inwerk van groot hoeveelhede organiese materiaal in die grond, waarna dit met water versadig en met plastiek bedek word sodat anaërobiese mikrobes kan prolifereer. Die anaërobiese toestande en verwante veranderinge in die grondmikrobioom vernietig herplantpatogene.

Sy hoop dat veelvuldige boordproewe wat die effektiwiteit van anaërobiese gronddisinfestasie demonstreer dit uiteindelik sal toelaat om beroking te vervang. Alhoewel anaërobiese gronddisinfestasie meer ingewikkeld en moontlik duurder as beroking is, is dit meer omgewingsvriendelik en verhoog die organiese materiaal in die grond.

Intussen dink McLeod beroking gaan nog 'n wyle met ons wees. "Herplantsiekte is al vir dekades 'n probleem. Omdat jy so 'n breëspektrumbehandeling benodig om al die organismes te beheer het ons nie tans 'n ander oplossing nie."

Featured Image: Grondtoedienings van semiselektiewe middels tydens ’n boordproef (Credit: VERSKAF DEUR PROF. ADÉLE MCLEOD | UNIVERSITEIT STELLENBOSCH)