Die Hortgro 2024 Steenvrugvelddag

Organiese materiaal na onder

Kompos in die plantgate is hoogs effektief om organiese materiaal direk in die grond te meng.

Na plant kan organiese materiaal slegs deur óf wortels óf grondorganismes in die grond ingebring word. Plantwortels voeg organiese materiaal direk deur worteleksudate en indirek deur ontbinding van dooie wortels by die grond. “Bome het permanente wortels asook ’n klomp nie-permanente wortels,” het prof.

Wiehann Steyn, algemene bestuurder van Hortgro Science, verduidelik. “Die fyn wortels word elke seisoen hernu, en wanneer die fyn wortels doodgaan, word dit ook organiese materiaal.” Dekgewasse bied ’n dubbele voordeel. Onder die grond verskaf hulle wortels organiese materiaal en bo die grond vorm hulle ’n natuurlike deklaag.

Oudewagendrift het ’n grasdekgewas in die werksry wat in die somer terugsterf om ’n organiese laag op die grond te skep wat grondmikrobes teen sonlig, uiterste temperature en uitdroging beskerm.

Deklae en dekgewasse

Hendrik Pohl, konsultant by Holistic Horticulture, het die voordele en nadele van verskillende deklae bespreek.

Kaf en hooi breek maklik af en kan dus ’n vinnige koolstofinspuiting aan grondorganismes lewer. Hy het egter gewaarsku dat produsente nie verbaas moet wees as die florerende grondlewe die deklaagmateriaal mettertyd ál gouer opgebruik nie. Kompostoedienings inokuleer die grond met groot getalle mikroörganismes en versnel deklaagafbraak nog verder.

Meer komplekse deklaagmateriaal soos kanola-kaf en houtspaanders sal langer hou en ook swamme bo bakterieë bevorder. Vrugtebome verkies oor die algemeen grond wat deur swamme eerder as bakterieë gedomineer word. Wanneer dit kom by dekgewasse, stel Pohl voor dat produsente saad voor oes met ’n kunsmisstrooier saai en toelaat dat werkers dit intrap soos wat hulle in die boord werk.

Die dekgewassaad sal na oes gereeld klein bietjies water moet kry sodat dit kan vestig, maar die bome kan steeds relatief droog bly om hergroei te verhoed. Dekgewasse kan aan die einde van die winter beëindig word deur dit óf te sny óf met ’n krimproller plat te rol.

Dit moet egter nie fyn gesny word nie, want dan waai die materiaal weg of breek so vinnig af dat dit nie die grond gedurende die somer beskerm nie.

Opleiding van jong bome

Jongboombestuur van nektariens is in ’n derdeblad Tifanyblok bespreek. Dié nektariens is as dubbelleiers opgelei. Tifany is ’n laat nektarienkultivar wat geneig is om nuwe lote aan die punt van bestaande lote eerder as verder terug op die loot te stoot. Oudewagendrift plant in die winter.

Bome word ’n week na plant vier vingers bo die onderste draad afgeknip en aan die draad vasgemaak. Die bome sal vyf of ses nuwe lote uitstoot waarvan slegs drie gehou word. Sodra hulle ongeveer een en ’n halwe snoeiskêr lank is, word die beste twee gekies en vasgemaak, en die derde een verwyder.

“Die ding wat baie mense dan doen, en ek ook vroeër jare gedoen het, is om die mense wat die lote vasgemaak het daarna op ander plekke te gebruik,” het Wilhelm Naudé, direkteur van Oudewagendrift (Uitzicht) Boerdery, gesê. “Ons het die laaste klompie jare ’n praktyk dat daardie mense in die boord bly.”

Hulle werk is om elke tweede week die lootgroei op vier vingers af te knyp sodat lote nie te sterk word en met die leiers kompeteer nie. In die weke tussenin maak hulle die lote vas. Die span volg hierdie roetine tot einde Februarie. “As jy dit nie doen nie, raak die lote te lank, en die boom gee vir jou ’n klomp sileptiese lote wat te sterk raak, en dan boet jy leiergroei in,” het Naudé verduidelik. “Ons kry dit 90% reg dat ons bome binne een jaar aan die einde van Februariemaand by die boonste draad is.”

Somersnoei van nektariens en pruime

Hannes Laubscher, tegniese direkteur by United Exports het drie aksies bespreek wat Oudewagendrift in Tifany toepas, en wat vir meeste midseisoen perske- en nektarienkultivars sou geld. Die eerste aksie word gedoen wanneer perskes en nektariens in pitverharding ingaan.

Alle waterlote word tot vier vingers teruggesny om kompetisie te verminder en ligpenetrasie te verbeter. Die tappies sal gewoonlik twee sagter lote stoot wat potensieel in die volgende seisoen kan vrugte dra. Die tweede aksie is om die blaredak rondom twee weke voor oes oop te sny om ligpenetrasie vir beter vrugkleur te verbeter en spuitaanwendings vir veral blaaspootjies te fasiliteer. Wanneer groei teen einde Februarie of begin Maart stop, word die derde aksie uitgevoer.

“Dan doen ons ordentlike lighuishouding en spreek boomvorm aan,” het Laubscher gesê. “Ons bring ook die hoogte terug na 80% van die boomry.” Charl Stander, tegniese raadgewer by Freshness First, het somersnoei van pruime in ’n 10-jaaroue Ruby Sun-blok bespreek. “Ons twee groot vyande vir steenvrugproduksie in die Wes-Kaap is sonbrand en windskade wat uitpakke benadeel,” het hy gesê.

Hy waarsku dus teen onnodige somer-snoei wat sonbrand in laat pruimkultivars kan vererger. Indien bome geil is en somersnoei vereis, moet dit teen die eerste week van Desember klaar wees sodat daar genoeg tyd vir hergroei van lote is. Die nuwe lootgroei help om laat pruime teen son te beskerm.

Snoei vir lighuishouding en boomvorming word eers na die oes aan die einde van die seisoen gedoen. Die deskundiges wat die besprekings gelei het, het beklemtoon dat produsente hulle snoeistrategie volgens die kultivar en area moet aanpas. Daar bestaan geen resepte wat geld vir alle steenvrugte in alle areas nie.

BOX:

Bedankings Die volgende persone het die Steenvrugvelddag moontlik gemaak deur met die reëlings, voorleggings en boordstap te help.

• Bennie Diedericks, Resalt
• Hannes Laubscher, United Exports
• Wilhelm Naudé, Oudewagendrift (Uitzicht) Boerdery
• Hendrik Pohl, Holistic Horticulture
• Pierre Rossouw, Stems Fruit
• Charl Stander, Freshness First
• Sheila Storey, Nemlab.