Somersnoei van wingerd BENEDE-ORANJERIVIERGEBIED

Materiaal en metodes

Die studie is uitgevoer op 'n vyfjaar oue Vitis vinifera L. cv. 'Sultanina' H5 geënt op Ramsey (Vitis champini) wingerd, op Yarona-plaas, Kanon-eiland, in die Benede-Oranje-riviergebied.

Die blok is in 2013 gevestig, 3.3 m x 1.8 m gespasieer op Augrabiesgrond en opgelei op 'n gewelprieelstelsel. Wingerdboupraktyke is toegepas soos vir produksie van uitvoergehalte 'Sultanina'-tafeldruiwe. Plastiekseile is ses weke voor oes oor die lower aangebring om druiwe teen reënskade te beskerm. Dit is na oes verwyder.

Eksperimentele uitleg en snoeibehandelings

Die eksperimentele uitleg was 'n ewekansige blokontwerp met sewe behandelings, herhaal in vyf blokke, met 'n eksperimentele eenheid bestaande uit ses eksperimentele wingerdstokke. Die vier middelstokke was data-stokke.

Vier naoessomersnoeibehandelings is vanaf die 2018/19 seisoen vir drie opeenvolgende seisoene toegepas (Tabel 1). Die 33%-lootverwyderingsbehandeling toegepas 45 dae ná oes was gegrond op bedryfsriglyne (Van der Merwe, 2017). Behandelings met 66% lootverwydering en behandelings wat een dag na oes toegepas is, is ingesluit om die impak van strawwe snoei en 'n lang tydperk beskikbaar vir reserwe-akkumulasie te evalueer.

Twee vooroessomersnoeibehandelings (lentesnoei) is vanaf 2019/20 vir twee groeiseisoene toegepas (Tabel 1). Dit het 33% en 66% snoeibehandeling (RS33BF en RS66BF) vir lootverwydering voor blom (EL-stadium 18) ingesluit. Hierdie lentesnoeibehandelings is bygevoeg op grond van die teorie dat verbetering van deurlating van fotosintetiese aktiewe straling (FAS) deur die blaredak tydens blomprimordia-inisiasie sal bydra tot verhoogde oogvrugbaarheid.

Resultate en bespreking

Die eerste twee seisoene se resultate het 'n tendens getoon dat die 33% lootverwyderingsbehandeling van beide naoessomer-snoeidatums, die naoeskoolhidraatreserwe-akkumulasie in die huidige seisoen verbeter het, wat oorgedra is na die volgende seisoen. Die lentesnoeibehandelings het gelei tot verhoogde styselvlakke voor bot van die volgende seisoen. Die 66%-lootverwyderingsbehandeling wat 45 dae ná oes toegepas is, het aansienlik laer styselvlakke tot gevolg gehad, wat moontlik aandui dat 66% lootverwydering te straf is (data nie aangetoon nie).

In die derde seisoen was die enigste beduidende impak van snoeibehandelings die aansienlik laer styselkonsentrasie in wortels na bot van die volgende seisoen, vir beide die 66% naoeslootverwyderingsbehandelings en die 33% lootverwyderingsbehandeling 45 dae na oes (Figuur 1).

By die lentesnoeibehandelings was die lootmassa hoër as dié wat met die somersnoeibehandelings verkry is (Figuur 2). Die totale oorblywende blaaroppervlakte per wingerdstok het dieselfde tendens as lootmassa getoon (data nie aangetoon nie). In die laaste twee seisoene was die oorblywende hooflootblaaroppervlakte per wingerdstok van alle naoessomersnoeibehandelings aansienlik kleiner in vergelyking met die kontrole, terwyl die lentesnoeibehandelings nie beduidend van die kontrole verskil het nie (data nie aangetoon nie).

Na drie opeenvolgende seisoene van snoeibehandelings, is die eerste betekenisvolle impak van die behandelings in die derde seisoen aangeteken. Slegs die botpersentasie is betekenisvol beïnvloed (Figuur 3), maar daar was geen oordrag na die volgende seisoen (vierde seisoen) nie. 'n Tendens is waargeneem dat egaligheid van bot deur sommige behandelings verbeter.

Bot, oogvrugbaarheid, opbrengs, gehalte en groei is nie beïnvloed deur drie opeenvolgende seisoene van voor- en naoeslootverwyderingsbehandelings nie. Strawwe (66% lootverwydering) en laat (45 dae) naoessnoei het stysel in die wortels verminder, maar het nie enige van die gemete parameters beïnvloed nie. Nie een van die parameters het 'n konsekwente reaksiepatroon op snoeibehandelings getoon nie.
Na drie opeenvolgende seisoene van behandelings, het lootverwyderingsbehandelings nie 'n betekenisvolle positiewe impak op bot% (Figuur 3), egaligheid van bot (Figuur 4), vrugbaarheid (Figuur 5), opbrengs en gehalte (data nie aangetoon nie) gehad nie, maar dit het ook geen betekenisvolle negatiewe impak gehad nie.

Korrelasies bereken om die liniêre verwantskap tussen elke koolhidraatinhoudparameter en bot, produksie en gehalteparameters te bepaal, dui op baie swak (r<0.307; p≤0.05) tot matige (r<0.495; p≤0.05) korrelasies.

Die gebrek aan beduidende verskille tussen behandelings kan toegeskryf word aan:

1. herstelvermoë van die wingerd deur hergroei, vorming van nuwe lote en blare na somersnoei, weens gunstige temperatuur vir volgehoue fisiologiese aktiwiteit en voldoende voorsiening van water en voedingstowwe;
2. drie opeenvolgende seisoene van behandelings wat nie voldoende oordrageffek gehad het om beduidende verskille in TNK-status, bot en vrugbaarheid tot gevolg te hê nie;
3. variasie binne sommige data-stelle soos aangedui deur berekende standaardfoute (data nie aangetoon nie).

Opsomming en gevolgtrekking

Die studie bevestig dat na drie opeenvolgende seisoene se toepassing van lente- en somerlootverwyderingsbehandelings, daar geen betekenisvolle positiewe impak was op bot, vrugbaarheid, opbrengs en gehalte nie, maar dit het ook geen betekenisvolle negatiewe effekte gehad nie. Die resultate dui op geen wetenskaplike rede of wingerdkundige/praktiese voordeel vir die toepas-sing van die behandelings nie. Daarom sal arbeidskoste om hierdie behandelings toe te pas ten einde bot en vrugbaarheid te verhoog waarskynlik nie ekonomies geregverdig wees nie.

Op grond van vorige stu-dies waar 'n betekenisvolle impak op groei en opbrengs eers na vier agtereenvolgende seisoene se behandelings verkry is, is voor-gestel dat die proef vir ten minste nog een seisoen voortgesit word om vier opeenvolgende seisoene van behandelings te verkry, om enige oordrageffekte verder te evalueer en om patrone/tendense wat tot betekenis-volle verskille kan ontwikkel, te bevestig.

Wanneer is die beste tyd om snoei in die groeiseisoen toe te pas? Lentesnoei het geen nadelige effek op groei van stokke gehad nie (selfs die strawwe behandeling waar 66% lote verwyder is). Vroeg in die seisoen vind genoeg hergroei plaas en die beskikbare lang groeiperiode laat toe dat stokke se koolhidraatreserwes kan herstel.

Indien produsent somersnoei wil toepas om arbeidsinsette vir wintersnoei te verminder, word snoei direk na oes aanbeveel, as gevolg van die moontlike risiko’s verbonde aan die verlaagde styselinhoud, lootmassa en verminderde beskikbare blaaroppervlakte verkry met lootverwydering later (45 dae na oes).

Verwysings

Greven, M.M., S.M. Neal, D. Stuart Tustin, H. Boldingh, J. Bennett, and M. Carmo Vasconcelos. 2016. Effect of postharvest defoliation on carbon and nitrogen resources of high-yielding Sauvignon blanc grapevines. Am. J. Enol. Vitic. 67, 315-326.

Links, J. 2014. Effect of shoot removal on bud fruitfulness and yield of Vitis vinifera cv. 'Crimson Seedless' in the Western Cape. M Inst Agrar thesis, University of Pretoria, Private Bag x 20, 0028 Hatfield, South Africa.

Smith, J.P., and B.P. Holzapfel. 2009. Cumulative response of grapevine (Vitis vinifera L.) to late season perturbation of carbohydrate reserve status. Am. J. Enol. Vitic. 60, 461-470.

Trought, M.C.T., J.S. Bennett, and H.L. Boldingh. 2011. Influence of retained cane number and pruning time on grapevine yield components, fruit composition and vine phenology of Sauvignon Blanc vines. Aust. J. Grape Wine Res. 17, 258-262.

Van der Merwe, G.G. 2017. Guidelines for the preparation of table grapes for export- 2017/2018. South African Table Grape Industry. P.O. Box 2932, 7620 Paarl.

Vir verdere inligting, kontak Jan Avenant by mailto:janbud@icon.co.za