Koolhidrate, in die vorm van suikers en stysel, verskaf die energie wat noodsaaklik is vir al die fisiologiese en metaboliese prosesse in die ontwikkeling van 'n plant. Deur Dr Elmi Lötze (Hoof van ITEST™ Carbo-hydrates and ITEST™ Leaf)
Koolhidrate is die produk van fotosintese. Al die faktore wat fotosintese beïnvloed, bv. klimaat, bestuurspraktyke en voeding, speel dus 'n rol in die vervaardiging, verspreiding en akkumulasie van suiker en stysel in die plant. Dit verskil gedurende die seisoen, met suikerpieke in blare gedurende die vruggroeifase, teenoor lae stysels in wortels aan die einde van die winter.
Koolhidraatvlakke verskil ook tussen plantorgane en stysels is normaalweg in hoër vlakke teenwoordig in wortels en stamme, as in blare en lote. Verder wissel koolhidraatvlakke tussen die fenologiese stadia om te voorsien in die plant se behoeftes.
Ten laaste, sal die koolhidraatvlak in 'n spesifieke orgaan daarvan afhang of dit 'n sink of bron van fotosintaat is. So is 'n jong wingerdblaar 'n sterk sink wat afhanklik is van suikers vanaf lote en wortels gedurende die lente, maar dit verander in 'n bron van suiker na 'n paar weke.
Navorsing rakende die rol van veral reserwe-koolhidrate gedurende die ontwikkeling van die wingerdstok het veral gefokus op die allokasie en akkumulasie van stysel in die permanente organe – wortels, stam en lote. Die MSc-tesis van Keboneilwe Toolo, wat deur die bedryf befonds is, het veral gekonsentreer op hierdie organe en die seisoenale tendens van koolhidrate bepaal.
Read More
Uit die tesis was dit ook duidelik dat daar verskille in die vlakke tussen streke voorkom, wat die invloed van klimaat aangedui het. Verdere literatuur het verskeie verwantskappe met fenologiese stadia en ontwikkeling gerapporteer, bv. tussen die stysel in die stam en wortels en bot gedurende die lente. Hierdie inligting kan van groot waarde wees in die bestuur van tafeldruiwe indien dit op 'n praktiese wyse aan die produsent deurgegee kan word.
Voorheen was daar nie kommersiële laboratoriums wat koolhidrate op groot skaal bepaal en dan 'n diens op plaasvlak bied nie. Sedert 2020 word analises wel plaaslik gedoen. By Agri Technovation word koolhidraat-analises geïntegreer met bestuurspraktyke, bv. blaar-analises verder ontwikkel vir toepassing in die veld. 'n Toevoeging tot bestaande koolhidraat-inligting in die literatuur is die insluiting van koolhidraat-analises van blare.
Met behulp van die kommersiële diens, ITEST™ Carbohydrates, is 'n koolhidraat-indeks vir tafeldruiwe ontwikkel vir spesifieke fenologiese stadia of kritiese aksie-tye gedurende die seisoen, wat die volgende inligting verskaf vir besluitneming op plaasvlak:
- Die fisiologiese status van die plant op die datum van monsterneming.
- Die effek van voorafgaande omgewings- en bestuurspraktyke op die ontwikkeling tot dusver.
- 'n Vooruitskatting van die toekomstige ontwikkeling gebaseer op die seisoenale koolhidraattendens.
- 'n Geleentheid om invloed van spesifieke manipulasies op plantreaksie aan te dui.
'n Norm wat die ideale suiker, stysel en totale koolhidraatvlak van die onderskeie weefsels vir die onderskeie kritiese aksie-tye aandui, word gebruik vir die bestuur van die blok se koolhidraatvlakke. Aksies om die koolhidraatvlak te verhoog sluit in ringelering, beheer van vegetatiewe groei soos top, uitdun, besproeiing en voeding.
Die effek van die manipulasie word bepaal deur die intensiteit (bv. top of snoei), die tyd van toediening (bv. ringelering) en ook die fisiologiese stadium van die stok (lae teenoor hoë koolhidraatvlak). 'n Toepassing hiervan is die verhoging van suikervlakke in die bogrondse gedeelte tydens blom om te verseker dat daar voldoende energie beskikbaar is vir goeie vrugset.
Dan sal ringelering vir 'n kort periode suiker bokant die wond ophoop en meer energie beskikbaar stel vir die proses. Nadat die wond genees het, sal die suiker weer normaalweg na die onderkant van die wond – bv. die wortels – beweeg waar dit ook noodsaaklik is. Weens die direkte rol wat minerale elemente in fotosintese speel, word voeding in die vorm van blaarspuite reeds suksesvol ingespan in gewasse om koolhidraatvlakke te bestuur.
Byna al die essensiële elemente speel 'n direkte rol in fotosintese en 'n tekort aan een element, bv. magnesium, sal tot gevolg hê dat die hele proses afneem en die energiestatus van die plant beïnvloed. Dus speel blaar-analises ook 'n belangrike rol by koolhidraatbestuur.
Die gebruik van 'n blaar-analise vir besluitneming op plaasvlak is lank reeds bekend – alhoewel industrie-norms net bestaan vir een fenologiese stadium. By Agri Technovation word meer gereelde blaar-analises met unieke norms vir die kritiese aksie-tye (fenologiese stadia) gebruik om die voedingskomponent van koolhidraatbestuur aan te spreek.
Vir tafeldruiwe, word die volgende vier monsterdatums en weefsels tans gebruik vir koolhidraat-ingrype in die praktyk: vier weke voor knopbreek (lote en wortels), twee weke voor volblom (blare en wortels), en twee weke voor deurslaan (blare en wortels) en na oes (blare en wortels).
Tipiese resultate vir interpretasie en beplanning op seisoenale vlak word geïllustreer vir 'n spesifieke orgaan in Figuur 1. Die huidige seisoen se koolhidraatwaarde word só vergelyk met die hoë en lae norms vir die onderskeie kritieke aksie-tye. Die inligting word dan saam met ander analises, waarnemings en bestuurspraktye bespreek vir aanpassings of manipulasies om volhoubare plantprestasie te handhaaf.
Vir meer inligting oor die diens, kontak gerus vir Agri Technovation by mailto:pr@agritechnovation.com.
Besoek ons webwerf by, https://agritechnovation.co.za/ of kliek deur na https://laeveld.co.za/.
