Interne verbruining in Cripps Pink

Voor-oesfaktore wat verband hou met 'n risiko van diffuse verbruining sluit jonger boorde en sanderige gronde in. Oeslading speel ook 'n rol deurdat groter vrugte vinniger ryp word en minder suksesvol berg.

Crouch verduidelik dat optimale plukrypheid en kleurontwikkeling soms in konflik kan wees. Beter kleur beteken hoër waarde – maar beter bergingsvermoë kan ook produsente in staat stel om teen 'n beter prys te bemark. "Mense wil graag langtermyn stoor en hulle wil rooi vrugte hê. Nie alle vrugte gaan die paal haal nie."

Diffuse verbruining kan reeds binne drie maande vanaf die begin van berging ontwikkel. Omdat vrugte wat langer aan die boom gelos word om te kleur – dikwels dié aan die binnekant van die boom – 'n hoër risiko van verbruining het, beveel Crouch aan dat sulke vrugte nie vir langer as drie maande gestoor word nie.

Radiale verbruining is 'n seisoenale probleem

Radiale verbruining blyk meer algemeen te wees wanneer vrugte tydens die selvergrotingsfase aan relatief kouer weer blootgestel is. Dit mag moontlik lei tot digter vrugte wat diffusie van koolsuurgas belemmer – hoë weefselvlakke van koolsuurgas veroorsaak verbruining deurdat dit vrugselle beskadig.

Rypheid kan gaswisseling be'nvloed maar dit blyk minder belangrik te wees in die ontwikkeling van radiale as diffuse verbruining. Nietemin, nuwe navorsing bevestig dat vrugte wat té vroeg of té laat geoes word, wel meer sensitief is vir radiale verbruining.

Uit vorige studies blyk dit asof boom-ouderdom en grondtipe nie die voorkoms van radiale verbruining affekteer nie. Die persepsie is dat radiale verbruining vroeg in berging ontwikkel en pakhuise gebruik interne sortering om bruin vrugte voor uitvoer te verwyder.

"Jy loop egter die risiko dat vrugte bruin word tydens verskeping," sê Crouch, met verwysing na navorsing wat sy saam
met Heleen Taylor van ExperiCo Agri-Research Solutions gedoen het. Die span se data het gewys dat radiale verbruining tydens verskeping en rakleeftyd kan vererger, veral in hoërisiko-seisoene en na lang bergingsperiodes.

Beste praktyke vir berging

Dit is noodsaaklik om op die regte stadium te oes. Vrugte wat reeds verby die optimale plukrypheid is, sal waarskynlik interne verbruining ontwikkel. "Die meerderheid van jou vrugte sal dus voor ses maande verkoop moet word," sê Crouch. "Indien jy die risiko wil neem om vrugte te stoor, watter vrugte moet jy hiervoor kies?" Sy raai produsente aan om styselafbraak te meet en daarvolgens te besluit.

Onlangse navorsing het weereens bevestig dat trapsgewyse verkoeling die voorkoms van diffuse verbruining verminder. Navorsing het ook gewys dat trapsgewyse verkoeling noodsaaklik is vir die beheer van radiale verbruining.

Crouch vermoed dat nuwer kultivars meer sensitief mag wees vir koueskade. "Al die nuwe protokolle het baie lang trapsgewyse verkoeling," sê sy. "Nie soos die kits geforseerde verkoeling wat ons in die verlede gehad het nie."

Alhoewel daar nog baie te leer is oor interne verbruining in Cripps Pink, verstaan ons dié kultivar baie beter as ander kultivars, reken Crouch. "Ons weet dat as jy die vrugte té ryp oes en teen té lae temperature stoor, gaan jy diffuse verbruining kry. Ons weet dat ons in sekere seisoene radiale verbruining kry, en in sommige seisoene nie, dat die risiko oor die algemeen hoër is in koeler seisoene, en dat oesrypheid ook rol speel."

Verbruining in ander kultivars is nie altyd so eenvoudig nie. "In ander kultivars, soos byvoorbeeld Fuji, probeer ons nog al die patrone van verbruining ontsyfer," sê Crouch. "Ons het navorsing nodig sodat mens 'n stoorresep kan maak vir elke soort vrug en elke tipe verbruining."