Geïntegreereerdede plaagbestuur

Voorsorg is beter as nasorg

Geïntegreerde plaagbestuur omvat voorkoming en behandeling. "Voorkomende strategieë moet begin deur 'n lewensvatbare ekosisteem te skep wat biologiese beheer sal bevorder," het Van Zyl beklemtoon. "Ons moet 'n omgewing skep waarin biologiese beheeragente kan oorleef en floreer."

Van Zyl het na resultate van proewe by Bokveldskloof in die Koue Bokkeveld verwys. Oor die afgelope twee dekades het die gebruik van kompos en deklae die stabiliteit van die grondekosisteem by Bokveldskloof sodanig verbeter dat bloedluis biologies beheer word en chemiese beheer sedert ten minste 2015 onnodig is.

Langtermyn volhoubare plaagbeheer maak staat op wat Van Zyl "ekologiese plaag-
bestuur" noem: elemente van natuurlike ekosisteme moet bygevoeg en onderhou word om gewasgesondheid te ondersteun. Dit sluit die verbetering van grondgesondheid deur verminderde bewerking, volgehoue grondbedekking, verhoogde grondkoolstof, en beheerde voedingstowwe in.

Dekgewasse help met baie van hierdie doelwitte en verskaf ook habitat vir bestuiwers en predatore. "Ons moet ons diversiteit vermeerder," het Van Zyl gesê. "Ons moet probeer om inheemse spesies wat hierdie areas kan oorheers in te bring."

Van Zyl is 'n voorstander van proaktiewe plaagbestuur – produsente moet 'n plan hê. Dit begin met 'n jaarlikse plaag- en siekterisikobepaling waarmee die druk vir elke boord bepaal word.

"Die idee is om boorde volgens risiko te groepeer sodat ons kan beplan watter strategie ons in elkeen van daardie boorde gaan volg," het Van Zyl gesê. "En tweedens, om te identifiseer waarom ons probleme in sekere boorde het. Produsente sal deur net dit te doen hulle plaagdoderverbruik alreeds verlaag omdat hulle nie meer 'n allesdekkende benadering volg nie."

Produsente behoort voordat die seisoen begin 'n bestuurstrategie vir elke siekte en plaag op hulle plaas te hê. Dit moet stelsels vir die vermindering van plaagbevolkings en gasheervatbaarheid insluit.

Van Zyl het 'n bestuurstrategie vir kalander as voorbeeld gebruik. Spuitaanwendings komplementeer ander praktyke soos stambande en brugverwydering. Data oor vrugskade in appelboorde wys dat chemiese beheer nie noemenswaardig meer effektief as stambande is nie.

Meet kom voor maatreëls

Monitering is een van die hoekstene van geïntegreerde plaagbestuur – geen veldslag word sonder goeie intelligensie gewen nie. "Ons moet effektief op 'n fyn skaal moniteer sodat ons seker kan wees dat ons die regte inligting het om geïntegreerde plaagbestuur as 'n beslissingsteunstelsel te kan gebruik," het Van Zyl gesê.

Hy het daarop gewys dat effektiewe monitering net so min oormatige as onvoldoende monitering beteken. Dit help niks om tyd in die boord te mors nie.

Kennis van die peste is noodsaaklik. "Mense moet genoeg opgeleide personeel wat goeie verkenners is en peste kan identifiseer op hulle plase hê," het Van Zyl gesê. "Dit is baie belangrik dat hulle peste en predatore uitmekaar kan ken."

Van Zyl het aanbeveel dat personeel op kursusse gaan. "Ons het uitstekende fasiliteite wat moniteringskursusse aanbied in die Wes-Kaap, spesifiek die Koue Bokkeveld Opleidingsentrum."

Vertroudheid met die biologie en bevolkingsekologie van peste is nodig vir die interpretasie en opvolg van moniteringsdata. Data oor die hoeveelheid en distribusie van peste tesame met, onder andere, omge-wingsdata kan in modelle wat besluite oor beheer ondersteun ingevoer word.

Van Zyl het kodlingmot as voorbeeld van die toepassing van monitering en modellering in plaagbestuur gebruik. In lae-risiko boorde behoort paringsontwrigting saam met vroeë-seisoen chemiese beheer verdere chemiese beheer later in die seisoen onnodig te maak. Minder bespuiting beteken minder impak op voordelige insekte en die omgewing, asook laer kostes.

In hoë-risiko boorde sal bespuiting regdeur die seisoen nodig wees, in kombinasie met ander strategieë soos paringsontwrigting, gereelde boordsanitasie, uitdunning in sakke, en verwydering van papies. Dit behoort die plaagdruk en spuitaanwendings vir die volgende seisoen te verminder.

Korrekte spuittegniek wat wegwaai van spuitmiddel verhoed is onontbeerlik. Wegwaai van spuitmiddel is 'n vermorsing en werk ook teen geïntegreerde plaagbestuur, omdat dit voordelige organismes dood en die omgewing beskadig.

"Geïntegreerde plaagbestuur is nie 'n metode om plaagdoderverbruik te verminder nie," het Van Zyl gesê. "Chemiese aanwendings bly die hart van die stelsel en 'n integrale deel van geïntegreerde plaagbestuur. Maar chemie is nie 'n wondermiddel nie. Moenie volgens 'n program spuit nie –
gebruik 'n strategie om peste te beheer."